På 140 stader rundtom i Skandinavia vil dykkarar i kveld forsøka å setja ein ny Guinness-rekord. Ein håpar at meir enn 1000 dykkarar vil finna fram symjeføter og oksygentank, og gje seg ut i det våte element samstundes, nøyaktig klokka 20.07 i kveld.

Mellom dei som arrangerer nattdykk er Michael Naunheim i Tysnes Sjø- og Fritid. Det er førebels ikkje det store oppmøtet.


Aukande popularitet

For anledninga er redaktør for bladet «Dykking», Christian Skauge, på vitjing på Tysnes. Skauge er rangert som ein av dei beste undervassfotografane i landet, og har vunne fleire prisar for sine makrobilete av livet i sjøen.

Nattdykkinga vert halde kvart år den fyrste torsdagen i desember. Skauge, som er ein ivrig forkjempar for det årlege rekordforsøket, håpar at fleire fattar interesse.

– Dette er tredje året nattdykking vert arrangert. Det fyrste året deltok 351 dykkarar, etter kvart har fleire fatta interesse for rekordforsøket. I år deltek forhåpentlegvis over 1000 dykkarar, frå mellom anna Sverige, Danmark, Tyskland og Estland, seier han.